چالاکییەکان
کارگە، بەرنامەی جێبەجێ، کەمپینی خوێندەواری یاسایی و دەستپێشخەرییەکانی پەرەسەندن لە سەرانسەری هەرێمی کوردستان.
- No matches
بەردەوامی هەوڵەکان بۆ جێبەجێکردنی ستراتیژیەتی نیشتیمانی سەروەری یاسا
لە پێناو هەنگاونان بەرەو قۆناغێکی نوێ و کاراتر لە جێبەجێکردنی ستراتیژیەتی نیشتیمانی سەروەری یاسا، ڕۆژی 17ی حوزەیرانی 2026، ستافی پڕۆژەی NORAD لە ڕێكخراوی لێكۆلەر بۆ پاڵپشتی سەروەری یاسا و دیموكراسی ، بە هاوکاری بەڕێز شیلان عارف، بریکاری وەزارەتی دادی هەرێمی کوردستان و جێگری دووەمی تیمی نیشتیمانی، دوو کۆبوونەوەی گرنگ و ئەرێنیان لە شاری بەغدا ئەنجامدا. کۆبوونەوەکان لەگەڵ هەر یەک لە بەڕێز د. بورهان مەزهەر القیسی، بریکاری وەزارەتی دادی فیدراڵ و جێگری یەکەمی تیمی نیشتیمانی، و بەڕێز د. خالید شەوانی، وەزیری دادی عێراق و سەرۆکی تیمی نیشتیمانی، بەڕێوەچوون. لە ماوەی ئەم کۆبوونەوانەدا، تیشک خرایە سەر دوایین پێشکەوتنەکان و هەنگاوە كرداریەكان لە پڕۆسەی داڕشتن و جێبەجێکردنی پلانی ستراتیژیەتی نیشتیمانی سەروەری یاسا. هەروەها، گفتوگۆی ورد لەسەر هەنگاوەکانی داهاتوو و شێوازی هەماهەنگی لەگەڵ وەزارەت و دامەزراوە پەیوەندیدارەکان کرا، بە مەبەستی بەرەوپێشبردنی پڕۆسەی داڕشتن و جێبەجێکردنی پلانە لاوەکییەکانی وەزارەتەکان. هەردوو کۆبوونەوەکە جەختیان لەسەر گرنگی بەردەوامی هەماهەنگی و هاوکاری نێوان لایەنە پەیوەندیدارەکان کردەوە، بە شێوەیەک کە ببێتە هۆی گواستنەوەی ستراتیژیەتەکە لە قۆناغی پلاندانان بۆ قۆناغی جێبەجێکردنی کرداری و گەیشتن بە ئامانجە ستراتیژییە دیاریکراوەکان. ئەم هەنگاوە بەشێکە لە هەوڵە بەردەوامەکان بۆ بەهێزکردنی سەروەری یاسا و دامەزراندنی چوارچێوەیەکی کارای نیشتیمانی و دادپەروەری لە عێراق بە سەرپەرشتی ستافی پڕۆژەی NORAD لە ڕێكخراوی لێكۆلەر بۆ پاڵپشتی سەروەری یاسا و دیموكراسی.
ئامادەکردنی پلانە جێبەجێکارییە لاوەکییەکان بۆ ستراتیژیی نیشتمانی بەهێزکردنی سەروەری یاسا لە عێراق (٢٠٢٥–٢٠٢٩)
لە چوارچێوەی پڕۆژەی "بەهێزکردنی سەروەری یاسا لە عێراق و هەرێمی کوردستان" ڕۆژانی ٢٠–٢١ی ئایاری ٢٠٢٦، لە شاری سلێمانی، ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، بە هاوبەشی ڕێکخراوی هاوکاری خەڵکی نەرویجی (NPA) و بە هەماهەنگی لەگەڵ وەزارەتی دادی حکومەتی فیدراڵی عێراق، وۆرکشۆپێکی دوو ڕۆژەی بۆ ئامادەکردنی پلانە جێبەجێکارییە لاوەکییەکانی ستراتیژیی نیشتمانی بەهێزکردنی سەروەری یاسا (٢٠٢٥–٢٠٢٩) بەڕێوەبرد. لە ئەم وۆرکشۆپەدا ژمارەیەک لە نوێنەرانی دامەزراوە حکومییەکانی فیدراڵ بەشدارییان کرد، لەوانە: وەزارەتی ناوخۆ، ئەنجومەنی باڵای دادوەری، ئەمینداریەتی گشتیی ئەنجومەنی نوێنەران، وەزارەتی لاوان و وەرزش، دەستەی دەستپاکی، تۆڕی ڕاگەیاندنی عێراق، وەزارەتی بەرگری، ڕاوێژکاری ئاسایشی نیشتمانی لە ئەمینداریەتی گشتیی ئەنجومەنی وەزیران، و وەزارەتی دەرەوە. ئامانجی سەرەکیی وۆرکشۆپەکە بریتی بوو لە بەهێزکردنی بنەماکانی سەروەری یاسا و داڕشتنی پلانە جێبەجێکارییەکان بۆ ستراتیژیی نیشتمانی، بە شێوەیەک کە هەموو دامەزراوە پەیوەندیدارەکان بە شێوەیەکی ڕێکخراو و هاوبەش لە پرۆسەی جێبەجێکردندا بەشداری بکەن. لە ڕۆژی یەکەمدا، باس لە بنەما و ئامانجەکانی ستراتیژیی نیشتمانی و پلانی سەرەکیی جێبەجێکردنی کرا. هەروەها، پلانی لاوەکی وەزارەتی دادی حکومەتی فیدراڵ لەلایەن لیژنەی تایبەتمەندی وەزارەتەکە پێشکەش کرا، و بەشداربووان گفتوگۆیان لەسەر دابەشکردنی ئەرک و بەرپرسیارێتییەکان لەنێوان وەزارەت و دامەزراوە جیاوازەکاندا کرد، بۆ دڵنیابوون لە جێبەجێکردنی ورد و کارای ستراتیژییەکە لە ماوەی ساڵانی داهاتوو. لە ڕۆژی دووەمدا، دوای ئەنجامدانی گفتوگۆ و کاری گرووپی، هەر دامەزراوەیەک پلانی جێبەجێکاریی لاوەکیی خۆی پێشکەش کرد و لەسەر ناوەڕۆک و میکانیزمەکانی جێبەجێکردنی گفتوگۆ کرا. لە کۆتایی وۆرکشۆپەکەدا، جەخت لەسەر گرنگی هەماهەنگی و هاوکاریی بەردەوام لەنێوان هەموو وەزارەت و دامەزراوە پەیوەندیدارەکان کرایەوە، وەک مەرجێکی سەرەکی بۆ سەرکەوتنی ستراتیژیی نیشتمانی بەهێزکردنی سەروەری یاسا (٢٠٢٥–٢٠٢٩). ئامانجی کۆتایی ئەم هەوڵانەش بریتییە لە باشترکردنی خزمەتگوزاری بۆ هاوڵاتیان، بەهێزکردنی دادپەروەری و چەسپاندنی بنەماکانی سەروەری یاسا لە سەرتاسەری عێراق و هەرێمی کوردستان.
بەڕێوەچوونی دووەمین کۆبوونەوەی ڕاوێژکاری سەبارەت بە ڕەشنووسی ڕێبەری ڕێککارەکانی دادگا سزاییەکان
لە چوارچێوەی پرۆژەی پالپشتی کراو لەلایەن ڕێکخراوی National Endowment for Democracy (NED)، لە ڕێکەوتی ١٦/٥/٢٠٢٦، دووەمین کۆبوونەوەی ڕاوێژکاری لە شاری دهۆک بەڕێوەچوو، بە مەبەستی پێداچوونەوە بە ڕەشنووسی ڕێبەری ڕێککارەکانی دادگا سزاییەکان. کۆبوونەوەکە بە بەشداری ١٨ دادوەر، داواکاری گشتی و ڕاوێژکاری ئەنجوومەنی دادوەری، هەروەها بەڕێوەبەری نووسینگەی سەرۆکی ئەنجوومەنی دادوەری و ڕێکخەری ئەنجوومەن بۆ ئەم پرۆژەیە بەڕێوەچوو. لە سەرەتای کۆبوونەوەکەدا، دادوەری داواکاری گشتی بەڕێز بدرالدین کریم بەرزنجی، سەرۆکی ڕێکخراوی لێکۆڵەر بۆ پاڵپشتی سەروەری یاسا و دیموکراسی، وتەی دەستپێکی پێشکەش کرد و بەخێرهاتنی میوان و بەشداربووانی کرد. دواتر، دادوەر حسین صالح ئیبراهیم، نوێنەری دادگای تێهەڵچوونەوەی ناوچەی دهۆک، وتەی دادگاکەی پێشکەش کرد و سوپاسی ڕێکخراوی لێکۆڵەری کرد بۆ ئامادەکردن و ڕێکخستنی ئەم کۆبوونەوە ڕاوێژکارییە. پاشان، دادوەری داواکاری گشتی ماجد محمد ئەحمەد، جێگری سەرۆکی فەرمانگەی داواکاری گشتی دهۆک، وتەی فەرمانگەکەی پێشکەش کرد. لە بەشی سەرەکی کۆبوونەوەکەدا، دادوەری خانەنشین ڕەحیم عگەیلی ڕەشنووسی ڕێبەری ڕێککارەکانی دادگا سزاییەکانی خستەڕوو و بەشداربووان بە شێوەیەکی ورد سەرنج، تێبینی و پێشنیارەکانی خۆیان بۆ دەوڵەمەندکردنی ڕەشنووسەکە پێشکەش کرد. شایانی باسە کە سێیەمین کۆبوونەوەی ڕاوێژکاری لەسەر هەمان ڕەشنووس، لە پارێزگای سلێمانی بەڕێوە دەچێت، بۆ وەرگرتنی سەرنج و پێشنیاری پسپۆڕان و تەواوکردنی دەقی کۆتایی ڕێبەرەکە.
هەنگاوێکی نیشتمانی بۆ زیادکردن و جێگیرکردنی ناوی عێراق لە ڕیزبەندیی جیهانیی سەروەریی یاسا
لە ڕێکەوتی ٢١ی نیسانی ٢٠٢٦، لە شاری بەغدا، لە چوارچێوەی پڕۆژەی «بەهێزکردنی سەروەری یاسا لە عێراق»، ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، بە هاوبەشی لەگەڵ ڕێکخراوی فریاگوزاری خەڵکی نەرویجی (NPA)، وۆرکشۆپێکی تایبەتی بەڕێوەبرد، بە بەشداری نوێنەرانی باڵای وەزارەتی دادی حکومەتی فیدراڵ، وەزارەتی دادی حکومەتی هەرێمی کوردستان، وەزارەتی دەرەوە، ئەنجوومەنی باڵای دادوەری حکومەتی فیدراڵ و ئەنجوومەنی دادوەری هەرێمی کوردستان. هەروەها، نوێنەرانی پڕۆژەی دادپەروەریی جیهانی (WJP) بە شێوەی ئۆنڵاین بەشدارییان کرد. تەوەری سەرەکیی ئەم وۆرکشۆپە تەرخان کرابوو بۆ تاوتوێکردنی هەنگاوە پراکتیکییەکان بۆ زیادکردنی ناوی عێراق لە ڕیزبەندیی جیهانیی سەروەریی یاسا، کە لەلایەن پڕۆژەی دادپەروەریی جیهانی (WJP) ئامادە دەکرێت. لە ماوەی وۆرکشۆپەکەدا، ناساندنێکی ورد لەسەر میتۆدی کارکردنی پێوەرەکە و ئەو پێداویستییە یاسایی، دامەزراوەیی و کارگێڕییانە پێشکەش کرا کە پێویستە عێراق دابینیان بکات. ئەمەش بوارێکی گونجاوی بۆ گفتوگۆیەکی کراوە لەنێوان بەشداربوواندا ڕەخساند، سەبارەت بە دەرفەت و ئاستەنگەکانی ئەم پرۆسەیە. وۆرکشۆپەکە بە کۆمەڵێک پێشنیار و دەرئەنجامی گرنگ کۆتایی هات، کە جەختیان لەسەر پێویستی جێبەجێکردنی پێوەرە نێودەوڵەتییەکان و بەردەوامی هەماهەنگی نێوان دامەزراوە پەیوەندیدارەکان کردەوە. هەروەها، جەخت لەسەر داڕشتنی نەخشەڕێگەیەکی نیشتمانی کرا بۆ بەهێزکردنی بنەماکانی سەروەری یاسا و دابینکردنی هەلومەرجی پێویست بۆ جێگیرکردنی ناوی عێراق لە ناو ڕیزبەندییە جیهانییەکان، بە شێوەیەک کە کاریگەرییەکی ئەرێنی لەسەر پێگەی وڵات لەسەر ئاستی جیهان هەبێت.
بەڕێوەچوونی وۆرکشۆپێک بۆ دامەزراوەییکردنی پلانی جێبەجێکردنی ستراتیژیی نیشتیمانیی سەروەریی یاسا
لە چوارچێوەی پڕۆژەی «پەرەپێدانی سەروەریی یاسا لە عێراق و هەرێمی کوردستان»، ڕێکخراوی لێکۆڵەر بۆ پاڵپشتی سەروەریی یاسا و دیموکراسی (IOL)، بە هاوبەشی ڕێکخراوی فریاگوزاری خەڵکی نەرویجی (NPA) و بە هەماهەنگی لەگەڵ وەزارەتی دادی حکومەتی فیدراڵ، لە ڕێکەوتی ٢٠ی نیسانی ٢٠٢٦ وۆرکشۆپێکی لە شاری بەغدا لەژێر ناونیشانی: دامەزراوەییکردنی پلانی جێبەجێکردن و ڕاکێشانی پشتگیری دارایی بۆ ستراتیژیی نیشتیمانیی سەروەریی یاسا (٢٠٢٥–٢٠٢٩) بەڕێوەبرد. وۆرکشۆپەکە بە ئامادەبوونی نوێنەرانی لایەنە پەیوەندیدارەکان بەڕێوەچوو، و تێیدا وتەی وەزارەتی دادی حکومەتی فیدراڵ لەلایەن بەڕێز د. برهان مزهر القیسی، وەکیل وەزیری داد، هەروەها وتەی ڕێکخراوی لێکۆڵەر بۆ پاڵپشتی سەروەریی یاسا و دیموکراسی (IOL) پێشکەش کرا. ناوەڕۆکی وۆرکشۆپەکە تیشکی خستە سەر میکانیزمەکانی جێبەجێکردنی ستراتیژیی نیشتیمانیی سەروەریی یاسا بە شێوەیەکی سیستەماتیک و دامەزراوەیی، هەروەها ڕێکارەکانی دابینکردنی بودجەی پێویست بۆ جێبەجێکردنی دەستپێشخەری و چالاکییەکانی پلانی جێبەجێکردن. هەروەها گرنگی دیاریکردنی ئەرک و دەسەڵاتی هەر لایەنێک و ئامادەکردنی ڕاپۆرتی هەڵسەنگاندن بۆ دەستپێشخەرییە جێبەجێکراوەکان تاوتوێ کرا، بە مەبەستی دڵنیابوون لە سەرکەوتوویی جێبەجێکردنی ستراتیژییەکە. بەشداربووان جەختیان لەسەر ئەوە کردەوە کە بۆ گەیشتن بە دەرئەنجامەکانی ستراتیژییەکە لە ماوەی پێنج ساڵی داهاتوودا، پێویستە هەموو هەنگاوەکان بە وردی دۆكۆمێنت بکرێن و بەردەوام بەدواداچوونیان بۆ ئەنجام بدرێت. هەروەها، لایەنی دارایی و میکانیزمەکانی دابینکردنی بودجەی پڕۆژەکان تاوتوێ کران و چەندین پێشنیاری کردارى وەک هەڵبژاردەی سەرچاوەکانی دابینکردنی دارایی خرانەڕوو. شایانی باسە، ئامادەبوونی د. ئەحمەد میران، بەڕێوەبەری تۆڕی ماف، وەک نوێنەری ڕێکخراوەکانی کۆمەڵگەی مەدەنی، بە سەرنج و پێشنیارەکانی بەشدارییەکی کاریگەری لە دەوڵەمەندکردنی گفتوگۆکانی وۆرکشۆپەکەدا هەبوو.
ئەنجامدانی کۆبوونەوەیەکی ڕاوێژکاری بۆ پێداچوونەوە بە ڕەشنووسی (ڕێبەری دادگا سزاییەکان) و توێژینەوەی (پێوەر و بەربەستەکانی دادگاییکردنی دادپەروەرانە لە دادگاکانی تاوان لە هەرێمی کوردستان).
لە چوارچێوەی پرۆژەی پالپشتی کراو لەلایەن رێکخراوی NED، ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، لە ڕێکەوتی ١٨/٤/٢٠٢٦ کۆبوونەوەیەکی ڕاوێژکاری لە شاری هەولێر بەڕێوەبرد. کۆبوونەوەکە بە بەشداری ٢١ دادوەر، داواکاری گشتی، لێکۆلەرەوانی دادوەری و راوێژکارانی یاسایی، هەروەها بەڕێوەبەری نووسینگەی سەرۆکی ئەنجوومەنی دادوەری، ڕێکخەری ئەنجوومەن بۆ ئەم پڕۆژەیە، نوێنەری دەستەی سەربەخۆی مافەکانی مرۆڤ و ئەندامانی ئەنجوومەنی سەندیکای پارێزەران ئەنجامدرا، بە مەبەستی پێداچوونەوە بە ڕەشنووسی ڕێبەری «ڕێکارەکان لە دادگا سزاییەکان» و گفتوگۆ لەسەر توێژینەوەی «پێوەر و بەربەستەکانی بەردەم دادگاییکردنی دادپەروەرانە لە دادگاکانی تاوان لە هەرێمی کوردستان.» لە بەشی یەکەمی کۆبوونەوەکەدا، دادوەری خانەنشین ڕەحیم عەگیلی ڕەشنووسی ڕێبەری «ڕێکارەکان لە دادگا سزاییەکان» پێشکەش کرد. پاشان، بەشداربووان سەرنج، تێبینی و پێشنیارەکانیان خستنەڕوو. لە بەشی دووەمدا، توێژەری مافپەروەر ئازاد وەڵەدبەگی توێژینەوەی «پێوەر و بەربەستەکانی بەردەم دادگاییکردنی دادپەروەرانە لە دادگاکانی تاوان لە هەرێمی کوردستان» پێشکەش کرد و گرنگترین دەرئەنجام و بابەتە سەرەکییەکانی شی کردەوە. بەشداربووانیش بە تێبینی و بۆچوونەكانیان، ناوەڕۆکی توێژینەوەکەیان دەوڵەمەندتر کرد. شایانی باسە، بڕیارە هەمان کۆبوونەوەی ڕاوێژکاری لە پارێزگاکانی سلێمانی و دهۆکیش ئەنجام بدرێت، بۆ وەرگرتنی سەرنج و پێشنیاری لایەنە پەیوەندیدارەکان و دەوڵەمەندکردنی هەردوو پڕۆژەکە.
ڕێکخراوی لێکۆڵەر خولێکی ڕاهێنانی بۆ بەهێزکردنی توانای پارێزەران لە پاراستنی مافەکانی پێکهاتەکان و کەمینەکان بەڕێوەبرد
ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، بە هاوبەشی ڕێکخراوی بەرنامەی هاوکاری مەسیحی (Christian Aid – CAP)، خولێکی ڕاهێنانی یەک ڕۆژەی لە 12ی نیسانی2026 بە ناونیشانی «بەهێزکردنی توانای پارێزەران لە پاراستنی مافەکانی پێکهاتەکان و کەمینەکان» لە شاری هەولێر بەڕێوەبرد. ئەم خولە درێژەی چالاکییەکانی پڕۆژەی ساڵی ٢٠٢٥ بوو، کە لە ماوەی جێبەجێکردنی چەندین خول و چالاکیی هۆشیاری و گفتوگۆی یاسایی ئەنجام درا و لە ئەنجامیاندا کۆمەڵێک پێشنیاری یاسایی بۆ هەموارکردنەوەی یاسای پاراستنی مافەکانی پێکهاتەکان گەڵاڵە کرا. خولەکە بە بەشداری ژمارەیەک لە پارێزەران بەڕێوەچوو و دادوەر گۆران بەرزنجی وانە و بابەتەکانی ڕاهێنانەکەی پێشکەش کرد، بە مەبەستی بەهێزکردنی توانای یاسایی پارێزەران لە بواری داکۆکیکردن لە مافەکانی پێکهاتەکان و کەمینەکان. ئەم چالاکییە بەشێکە لە هەوڵە بەردەوامەکانی ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL) بۆ بەهێزکردنی سەروەری یاسا، پەرەپێدانی دادپەروەری، و پشتگیری لە بنەماکانی پێکەوەژیان و پاراستنی مافەکانی هەموو پێکهاتەکانی کۆمەڵگای هەرێمی کوردستان.
یەکەم هەنگاوی کرداری بۆ جێبەجێکردنی ستراتیژیی نیشتمانی بۆ سەروەری یاسا
لە چوارچێوەی پڕۆژەی «بنیادنانی ئاشتی و ئاسایش لە عێراق»، لە ڕۆژانی ١١ و ١٢ی کانوونی یەکەمی ٢٠٢٥، ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، بە هاوبەشی وەزارەتی دادی عێراق، بە هەماهەنگی لەگەڵ ڕێکخراوی فریاگوزاری نێودەوڵەتی (IRC) و بە پاڵپشتی دارایی UKaid، وۆرکشۆپێکی بۆ ئەندامان و نوێنەرانی وەزارەتی داد لە شاری بەغدا ئەنجامدا.لە وۆرکشۆپەکەدا، کە بە سەرپەرشتی پسپۆڕی نێودەوڵەتی، محەمەد تەمیمی، بەڕێوەچوو، »پلانی جێبەجێکردنی وەزارەتی داد» بۆ ساڵانی ٢٠٢٥–٢٠٢٩ داڕێژرا. بەشداربووان تیشکیان خستە سەر چۆنیەتیی جێبەجێکردنی پلانەکە، دابینکردنی پێداویستی و سەرچاوە پێویستەکان، و دانانی پێوەر بۆ هەڵسەنگاندن، بۆ دڵنیابوون لەوەی هەنگاوەکان بەکرداری و جێبەجێبكرێن و بە تەواوی لەگەڵ ستراتیژیی نیشتمانی بۆ بەهێزکردنی سەروەری یاسا و نەخشەڕێگای پێنج ساڵی داهاتوو بگونجێن.ئەم چالاکییە بە یەکەم هەنگاوی کرداری بۆ دەستپێکردنی جێبەجێکردنی ئەرک و دەستپێشخەرییەکانی وەزارەتی داد لە چوارچێوەی ستراتیژییەکەدا دادەنرێت. دەرەنجامەکانی ئەم وۆرکشۆپە بناغەیەکی پتەو بۆ قۆناغەکانی داهاتوو دادەنێن و یارمەتیدەر دەبن بۆ ئەوەی وەزارەتەکانی دیکەی بەشدار لە ستراتیژییەکەش هەنگاوە کردارییەکانیان جێبەجێبکەن.بەم شێوەیە، ئەم هەنگاوە دەبێتە دەستپێکێکی گرنگ و ڕێگەخۆشکەر بۆ گواستنەوە لە قۆناغی دانان و پەرەپێدانی ستراتیژییەکە بۆ قۆناغی جێبەجێکردنی کرداری و بەشداری‌کردن لە بنیاتنانی وڵاتێکی سەقامگیرتر و خاوەن سەروەریی یاسا.
بڵاوکردنەوەی دوو ڕاپۆرتی نوێ بۆ بەهێزکردنی سەروەری یاسا لە عێراق و هەرێمی کوردستان
لە درێژەی کار و چالاکییە بەردەوامەکانی پرۆژەی «بەهێزکردنی سەروەری یاسا لە عێراق»، کە لەلایەن ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، بە هاوبەشی ڕێکخراوی فریاگوزاری خەڵکی نەرویجی (NPA) و تۆڕی ماف (Maff Network) و بە پاڵپشتی دارایی یەکێتیی ئەورووپا (EU) جێبەجێ دەکرێت، لە ١٠ی کانوونی یەکەمی ٢٠٢٥ کۆنفرانسێک بۆ ڕاگەیاندنی دوو ڕاپۆرتی نوێ ئەنجامدرا.کۆنفرانسەکە بە ئامادەبوونی ژمارەیەکی زۆر لە پسپۆڕان، نوێنەرانی دامەزراوە حکومییەکان، ڕێکخراوەکانی کۆمەڵگەی مەدەنی و ڕێکخراوە نێودەوڵەتی و ناوخۆییەکان بەڕێوەچوو.یەکەم: «ڕاپۆرتی پێوەرەکان و باشترین ڕێکارەکانی دادگاییی دادپەروەرانە لە عێراق و هەرێمی کوردستان – ٢٠٢٥»ئەم ڕاپۆرتە تیشک دەخاتە سەر گرنگترین پێوەرە نێودەوڵەتییەکانی دادگاییی دادپەروەرانە کە بۆ دڵنیابوون لە بەڕێوەچوونی دادگایییەکی دادپەروەرانە بەکاردێن. هەروەها، ڕاپۆرتەکە باشترین ڕێکارەکانی پەیڕەوکراو لە ئاستی جیهان شی دەکاتەوە و چۆنیەتیی گونجاندن و بەکارهێنانی ئەم ڕێکارانە لەگەڵ بارودۆخی عێراق و هەرێمی کوردستاندا دەخاتەڕوو.دووەم: «دووەمین ڕاپۆرتی چاودێریکردنی دۆخی سەروەری یاسا لە عێراق و هەرێمی کوردستان – ٢٠٢٥»ئەم ڕاپۆرتە درێژەپێدەری یەکەمین ڕاپۆرتی چاودێریکردنی دۆخی سەروەری یاسایە کە لە ساڵی ٢٠٢٤ بڵاوکرایەوە، و تیشک دەخاتە سەر گرنگترین پێشکەوتنەکان و ئەو ئاڵنگارییانەی لەبەردەم سەروەری یاسا لە عێراق و هەرێمی کوردستاندا هەن.
خولی بەهێزکردنی توانای پارێزەران بۆ داكۆكیكردن لە مافی پێکهاتەکان و کەمینەکان
لە ڕۆژانی ٢٨ و ٢٩ی تشرینی دووەمی ٢٠٢٥، بە بەشداریی کۆمەڵێک لە پارێزەرانی شاری دهۆک، لەژێر سەرپەرشتی ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL) و بە هاوئاهەنگی سەندیکای پارێزەرانی کوردستان، خولێکی دوو ڕۆژە بە ناونیشانی «بنیاتنانی توانای پارێزەران لە داکۆکیکردن لە مافی پێکهاتەکان و کەمینەکان» ئەنجامدرا.لە ماوەی خولەکەدا، دادوەران بەدرەدین بەرزنجی و ڕەحیم عەقیلی وەک وانەبێژ، کۆمەڵێک تەوەری یاساییی گرنگیان سەبارەت بە بابەتەکانی پەیوەندیدار بە داکۆکیکردن لە مافی پێکهاتەکان و کەمینەکان ڕوونکردەوە و تیشکیان خستە سەر ئەو خاڵە یاساییانەی کە پێویستە پارێزەران لە کاتی داکۆکیکردن لە ماف و بەرژەوەندییەکانی ئەم پێکهاتانەدا جەختیان لەسەر بکەنەوە و گرنگییان پێ بدەن.لە ماوەی دوو ڕۆژی خولەکەدا، پارێزەرانی بەشدار بەشدارییەکی چالاکیان لە گفتوگۆکان کرد و لەگەڵ وانەبێژەکان کۆمەڵێک سەرنج و تێبینییان سەبارەت بە بابەتەکانی خولەکە ئاڵوگۆڕ کرد. هەروەها، بەشداربووان ئەزموون و زانیارییە پەیوەندیدارەکانیان لەبارەی ئەو بابەتانەوە هاوبەش کرد، کە بووە هۆی دەوڵەمەندکردنی گفتوگۆکان و بەهێزکردنی لایەنی پراکتیکیی خولەکە.
ئەنجامدانی خولی بەهێزکردنی تواناکان بۆ بەشی مافەکانی مرۆڤ لە دیوانی گشتیی ئەنجوومەنی وەزیران
لە چوارچێوەی پرۆژەی بەهێزکردنی سەروەری یاسا، کە لەلایەن ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL) جێبەجێ دەکرێت، خولی بەهێزکردنی تواناکان بۆ بەشی مافەکانی مرۆڤ لە دیوانی گشتیی ئەنجوومەنی وەزیران ئەنجامدرا.ئامانجی سەرەکیی خولەکە پەرەپێدانی تواناکانی پێکهاتەی کارگێڕی و کارمەندانی بەشی مافەکانی مرۆڤ و بەهێزکردنی ڕۆڵی بەشەکە لە پشتگیریکردن و بەشداری‌کردن لە جێبەجێکردنی ستراتیژیی نیشتمانی بۆ بەهێزکردنی سەروەری یاسا بوو.لە ماوەی خولەکەدا، بەشداربووان لە ڕێگەی گفتوگۆ، کارلێکی بەرهەمدار و ئاڵوگۆڕی ئەزموون و شارەزایی، لەسەر کۆمەڵێک بابەتی پەیوەندیدار بە کاری دامەزراوەیی، مافەکانی مرۆڤ و بنەماکانی سەروەری یاسا گفتوگۆیان کرد.ئەم خولە هەنگاوێک بوو بۆ پەرەپێدانی توانای دامەزراوەیی و مرۆیی بەشەکە و بەهێزکردنی ئامادەییی دامەزراوەكە بۆ ئەوەی ڕۆڵێکی کاریگەرتر لە جێبەجێکردن و بەدیهێنانی ئامانجەکانی ستراتیژیی نیشتمانی بۆ بەهێزکردنی سەروەری یاسا بگێڕێت.
بەڕێز وەکیلی وەزارەتی دادی حکومەتی فیدراڵ سەردانی ئۆفیسی ڕێکخراوی لێکۆڵەر لە هەولێر دەکات
دوای نیوەڕۆی ٢٤ی تشرینی یەکەمی ٢٠٢٥، د. برهان مزهر القیسی، وەکیلی وەزارەتی دادی حکومەتی فیدراڵی عێراق، لەگەڵ وەفدی هاوڕێی، سەردانی ئۆفیسی ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL) لە هەولێری کرد و لەگەڵ سەرۆک و ئەندامانی ئەنجوومەنی بەڕێوەبردنی ڕێکخراو کۆبووەوە.گفتوگۆکان تەرخان کرابوون بۆ ستراتیژیی سەروەری یاسا ٢٠٢٥–٢٠٢٩، کە لە مانگی تەممووزی ٢٠٢٥ لە بەغدا بە شێوەیەکی فەرمی ڕاگەیەندرا. لە دانیشتنەکەدا، دوایین قۆناغەکانی ئامادەکردنی پلانی نیشتمانی جێبەجێکردنی ستراتیژیی سەروەری یاسا و پرۆسەی ئامادەکردنی ئەم پلانە، کە ئێستا لە قۆناغی ئامادەکردندایە، خرانە بەر باس و گفتوگۆ.لە کۆتایی دانیشتنەکەدا، هەردوو لایەن لەسەر چەندین خاڵی گرنگ پەیوەندیدار بە پرۆسەی ئامادەکردنی پلانەکە ڕێککەوتن، کە وردەکارییەکانی لە ماوەیەکی نزیکدا بە شێوەیەکی فەرمی ڕادەگەیەندرێن.ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL)، وەک لایەنی خاوەن بیرۆکە و جێبەجێکەری پرۆژەکە، کە بە پشتگیری دارایی ڕێکخراوی فریاگوزاری خەڵکی نەرویجی (NPA) بەڕێوەدەچێت، ئەندامە لەو تیمی نیشتیمانییەی کە بە پێی فەرمانی دیوانی ژمارە (٧٠) لە ١٠ی تشرینی یەکەمی ٢٠٢٤ لەلایەن ئەنجوومەنی وەزیرانی عێراق پێکهێنراوە.