ستراتیژی نیشتمانی بۆ بەهێزکردنی سەروەریی یاسا و جێبەجێکردنی دادپەروەری لە کۆماری عێراق (٢٠٢٥–٢٠٢٩) چوارچێوەیەکی نیشتمانی و گشتگیری پێنج‌ساڵەیە کە بۆ بەهێزکردنی سەروەریی یاسا، پەرەپێدانی دادپەروەری و بەهێزکردنی دامەزراوەکانی داد و یاسا لە عێراق و هەرێمی کوردستان داڕێژراوە. ئەم ستراتیژییە لەسەر بنەمای هەماهەنگی و هاوبەشی نێوان دامەزراوە فەرمییەکانی حکومەتی فیدراڵ و حکومەتی هەرێمی کوردستان، دامەزراوە دادوەری و یاساییەکان، کۆمەڵگەی مەدەنی و هاوبەشە نێودەوڵەتییەکان پەرەی پێدراوە.
ئامانجی سەرەکیی ستراتیژییەکە بریتییە لە بەهێزکردنی سەروەریی یاسا، دادپەروەری، مافە بنەڕەتییەکانی مرۆڤ، شەفافیەت و لێپرسینەوە، لەگەڵ بەهێزکردنی توانای دامەزراوەکان و پەرەپێدانی چوارچێوە یاسایی و دامەزراوەییەکان. ستراتیژییەکە جەخت لەسەر ئەوە دەکاتەوە کە سەروەریی یاسا تەنها بە بوونی یاسا بەدەست نایەت، بەڵکوو پێویستی بە جێبەجێکردنی دادپەروەرانەی یاسا، یەکسانی لەبەردەم یاسا، دادگایی سەربەخۆ، شەفافیەت و چاودێریکردنی دەسەڵات هەیە.
لە چوارچێوەی ئەم ستراتیژییەدا، نزیکەی ٥٨ دەستپێشخەری ستراتیژی دیاریکراون کە بۆ جێبەجێکردنیان لەسەر ١٦ دامەزراوە و لایەنی پەیوەندیدار دابەشکراون. هەروەها، دەستپێشخەرییە ستراتیژییەکان بۆ پلانی سەرەکیی جێبەجێکردن و پلانی لاوەکی بۆ دامەزراوە بەشدارەکان وەرگێڕدراون، بە مەبەستی ئەوەی ستراتیژییەکە لە قۆناغی داڕشتنی ستراتیژییەوە بگوازرێتەوە بۆ قۆناغی جێبەجێکردنی کرداری و چاودێریکردنی ئەنجامەکان.
لە پرۆسەی ئامادەکردن و جێبەجێکردنی ستراتیژییەکەدا، ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL) بە هاوکاری وەزارەتی داد و بە پشتگیری شارەزایانی نێودەوڵەتی و ڕێکخراوی فریاگوزاری خەڵکی نەرویجی (NPA) بەشداریی کردووە. ستراتیژییەکە هەروەها چوارچێوەیەکی هاوبەش بۆ هەماهەنگی نێوان وەزارەتەکانی داد، دامەزراوە دادوەرییەکان، وەزارەتەکانی پلاندانان، دامەزراوەکانی دەستپاكی و دامەزراوەکانی ئەمنی و پەیوەندیدارەکانی حکومەتی فیدراڵ و هەرێمی کوردستان دابین دەکات.
لە ڕووی ناوەڕۆکەوە، ستراتیژییەکە سەرنج دەخاتە سەر چەندین بوار و تەوەری سەرەکی، لەوانە دادپەروەری مەدەنی، ئازادییە بنەڕەتییەکان و مافەکانی مرۆڤ، چاودێریکردنی دەسەڵات، بنبڕکردن و ڕێگریکردن لە گەندەڵی، جێبەجێکردنی یاسا، دادپەروەریی دەستووری و چاکسازیی دامەزراوەیی. ئەم تەوەرانە بە شێوەیەک دانراون کە بتوانن بنەماکانی سەروەریی یاسا لە بواری یاسایی، دامەزراوەیی و جێبەجێکردنەوە بەهێز بکەن.
لە هەمان کاتدا، ستراتیژییەکە گرنگی دەدات بە پەرەپێدانی توانای دامەزراوەکان و بەکارهێنانی پێوەر و ئەزموونی نێودەوڵەتی، بەتایبەتی لە ڕێگەی هەماهەنگیی نێوان دامەزراوەکان و بەشداریکردنی شارەزایی ناوخۆ و نێودەوڵەتی. لەم چوارچێوەیەدا، ئامانج ئەوەیە بنەماکانی سەروەریی یاسا لە جێبەجێکردنی یاسا و کارکردنی دامەزراوەکاندا بە شێوەیەکی کرداری و بەردەوام جێبەجێ بکرێن.
ستراتیژی نیشتمانی بۆ بەهێزکردنی سەروەریی یاسا و جێبەجێکردنی دادپەروەری (٢٠٢٥–٢٠٢٩) چوارچێوەیەکی نیشتمانییە بۆ هەماهەنگکردنی هەوڵە دامەزراوەیی و یاساییەکان، بەهێزکردنی کارامەیی دامەزراوەکان و پەرەپێدانی سەروەریی یاسا لە عێراق و هەرێمی کوردستان، بە پشتبەستن بە جێبەجێکردنی پلان بۆدانراو، چاودێریی بەردەوام و هەماهەنگی نێوان لایەنە پەیوەندیدارەکان.
