لە هەنگاوی کۆتایی قۆناغی دووەمی پڕۆژەی «بەهێزکردنی سەروەری یاسا لە عێراق و هەرێمی کوردستان»، ڕێکخراوی لێکۆڵەر بۆ پاڵپشتی سەروەری یاسا و دیموکراسی (IOL) بە هاوبەشی لەگەڵ ڕێکخراوی NPA نەرویجی، دانیشتنێکی ڕاوێژکاری بۆ تیمی نیشتمانی سەروەری یاسا لە شاری بەغدا بەڕێوەبرد.
دانیشتنەکە بە سەرپەرشتی د. خالد شوانی، سەرۆکی تیمی نیشتمانی و وەزیری دادی عێراق، و بە بەشداری هەردوو جێگری سەرۆکی تیم، د. برهان مزهر القیسي و خاتوو شیلان عارف، لەگەڵ ئەندامانی تیمی نیشتمانی بەڕێوەچوو.
ئامانجی سەرەکیی دانیشتنەکە پێداچوونەوە بە پلانی جێبەجێکردنی ستراتیژیی نیشتمانی بۆ بەهێزکردنی سەروەری یاسا و چەسپاندنی دادپەروەری (٢٠٢٥–٢٠٢٩) بوو، کە بڕیارە لە ماوەیەکی نزیکدا بچێتە بواری جێبەجێکردن، لە چوارچێوەی پلانە جێبەجێکارییە تایبەتەکان بۆ عێراق و هەرێمی کوردستان.
لە ناوەڕۆکی دانیشتنەکەدا، تیشک خراوەتە سەر وردەکارییەکانی پلانی جێبەجێکردن، لەوانە دیاریکردنی ئەرک و بەرپرسیارێتییەکانی هەر لایەنێکی پەیوەندیدار، دانانی خشتەی کاتی دیاریکراو بۆ تەواوکردنی هەر دەستپێشخەرییەک، و دانانی میکانیزمەکانی چاودێری و هەڵسەنگاندن بۆ دڵنیابوون لە جێبەجێکردنی کارا و سەرکەوتووانەی ستراتیژییەکە.
ئەم دانیشتنە هەنگاوێکی گرنگە بەرەو بەهێزکردنی سەروەری یاسا، چەسپاندنی دادپەروەری و شەفافیەت، و دڵنیابوون لە هەماهەنگی و هاوکاریی دامەزراوە پەیوەندیدارەکان بۆ جێبەجێکردنی ستراتیژیی نیشتمانی لە عێراق و هەرێمی کوردستان.